ನಾನೂ ಸ್ವಾವಲಂಬಿ (ಕವಿತೆ) - ಮಾನಿನಿ.

"ಬಾಲ್ಯದಲ್ಲಿ ತಂದೆ

ಪ್ರಾಯದಲ್ಲಿ ಗಂಡ

ವೃಧ್ದಾಪ್ಯದಲ್ಲಿ ಮಗನ

ಆಶ್ರಯವಿಲ್ಲದೆ ಹೆಣ್ಣೊಬ್ಬಳು

ಬದುಕಲಾರಳು

ಅವಳೆಂದಿಗೂ

ಗಂಡಸಿನ ಆಶ್ರಯ ಬಯಸುವವಳು"

ಎನ್ನುವ ಮಾತು ಇಂದಿಗೆ ಅನ್ವಯವಾಗದು 

ಅದನ್ನು ಹಿಂದೆ ತೆಗಿ

ನಾನು ಪುರುಷಾವಲಂಬಿಯಲ್ಲ

ಸ್ವಾವಲಂಬಿ

ಅಸ್ತಿತ್ವವಿರುವವಳು

ಕಾಲಿಗೆ ಸುತ್ತಿರುವ ಸರಪಳಿ ಕಿತ್ತು

ಎಲ್ಲ ಮಿತಿಗಳ ದಾಟಿ

ಜೀವಿಸ ಬಲ್ಲೆ ಸ್ವತಂತ್ರಳಾಗಿ ಸ್ವಾವಲಂಬಿಯಾಗಿ

ನಿನ್ನ ಬೆಳಕಿನ ಕಿರಣಗಳಿಗಾಗಿ

ಕಾಯುವವಳಲ್ಲ

ನಾನೀಗ ಸ್ವಯಂ ದೀಪಿಕೆ

ಸ್ವಪ್ರಕಾಶಿಣಿ

ನಿನ್ನ ಹೆಜ್ಜೆಗೆ ಸಮನಾಗಿ

ಹೆಜ್ಜೆ ಇಡಬಲ್ಲ ಸ್ವಾಭಿಮಾನಳು

ಸ್ವತಂತ್ರ ಮನುಷ್ಯಳು

ಆಗಿದ್ದೇನೆ ನಾನೀಗ!

ಓ ಗಂಡಸೇ!  ಇದೀಗ ತಿಳಿ

ನನ್ನ ಹುಟ್ಟಿಗೆ ನಿನ್ನ ಒಂದು ಹನಿ

ವೀರ್ಯ ಅನಿವಾರ್ಯ

ಆದರೆ ನನ್ನ ಬದುಕಿಗಲ್ಲ!

- ಮಾನಿನಿ.