ಸೈನಿಕರೇ ನಿಮಗಿದೋ ನಮನ (ಕವಿತೆ) - ಸುನಂದಾ ಪುರಾಣಿಕ.

ಪ್ರತಿದಿನ ಶಾಂತಿಯುತ ಜೀವನ ನಡೆಸಲು 

ಕಾರಣ ನಮ್ಮೀ ಸೈನಿಕರು

ದೇಶದ ಗಡಿಯನು ಕಾಯುವ ಯೋಧರು

ಅವರೇ ನಮ್ಮಯ ದೇವರು|

ಹೆತ್ತವರ ಮಡದಿ ಮಕ್ಕಳ ತೊರೆದು 

ದೇಶವೇ ನಮ್ಮ ಮನೆಯೆನ್ನುವರು

ಮಳೆ ಬಿಸಿಲು ಚಳಿಗಾಳಿಗೆ ಹೆದರದೆ

ದೇಶ ರಕ್ಷಣೆ ಮಾಡುವರು|

ದೇಶವ ಪ್ರೀತಿಸುವ ನಿಜ ದೇಶಭಕ್ತರು

ಶಿಸ್ತುಬದ್ಧ ಜೀವನ ನಡೆಸುವರು

ಲಕ್ಷಾಂತರ ಜೀವ ರಕ್ಷಿಸಲು ತಮ್ಮಯ

ಪ್ರಾಣ ತ್ಯಾಗವ ಮಾಡುವರು|

ಗಡಿಯಲ್ಲಿನ ಗುಂಡಿನ ಸದ್ದಿಗೆ ಹೆದರದೆ 

ನೀಡುವರು ಅದಕೆ ಪ್ರತ್ಯುತ್ತರ 

ಗುಂಡಿಗೆಯಲಿ ರೋಷ ತುಂಬಿಕೊಂಡು 

ಶತ್ರುಗಳ ಎದೆಸೀಳುವ ಕಾತುರ|

ಪ್ರತಿ ಉಸಿರಲಿ ಇರುವುದು ದೇಶಸೇವೆ 

ತಾಯ್ನಾಡು ಸವ೯ ಶ್ರೇಷ್ಠ 

ದೇಶವೇ ಅವರಿಗೆ ಎಲ್ಲಕ್ಕಿಂತ ಮಿಗಿಲು

ಸಹಿಸುವರು ಬಂದ ಸಂಕಷ್ಟ|

ಸೈನಿಕರ ಬದುಕು ಮುಳ್ಳಿನ ಹಾಸಿಗೆ 

ಕಠಿಣ ಸವಾಲಿನ ಜೀವನ

ರಕ್ತದಿ ದೇಶದ ಭವಿಷ್ಯ ಬರೆಯುವರು

ಸಲ್ಲಿಸೋಣ ಅವರಿಗೆ ನಮನ||

   - ಸುನಂದಾ ಪುರಾಣಿಕ, ಹಳಿಯಾಳ.ಉತ್ತರ ಕನ್ನಡ.