ಕಂಪು ಅಳಿಯದಿರಲಿ (ಕವಿತೆ) - ತುಳಸಿದಾಸ ಬಿ.ಎಸ್.

ದನಿ ಕೇಳಿ ಮನವು

ಕುಣಿದಂತೆ ನವಿಲು

ಜಾಣೆ ವಾರಿ ನೋಟಕೆ

ಇಣುಕಿದಂತೆ ಶಶಿಯು

ಚಿನ್ನ ನಿನ್ನ ನುಡಿಯು

ಜೇನಿನಂತೆ ಸವಿಯು

ಮನದ ಭಾವ ತಿಳಿಯಲು

ಮಿನುಗಿದಂತೆ ತಾರೆಯು

ತಾಳದಾದ ಬಯಕೆಗೆ

ಬಾಳೆಯಂತೆ ಬಾಗಿದೆ

ಗಳಿಸಿ ಪ್ರೀತಿ ನೆಲದ ಹಾಗೆ

ಅಳಿಯದಂತೆ ಉಳಿಯಲಿ

ಬೆಸೆದ ಬಂಧ ಹೂವಿನಂತೆ

ಉಸಿರು ಗಂಧ ಸೂಸಲಿ

ಹುಸಿಯದಂತೆ ಪ್ರೀತಿ ಬಳ್ಳಿ

ಹಸಿರು ಚದುರಿ ಹಬ್ಬಲಿ

ತಂಪನೆರೆವ ಗಾಳಿಯಂತೆ

ಗುಂಪು ಪ್ರೀತಿ ಸಾಗಲಿ

ಇಂಪು ಸುಖದ ನಿದ್ರೆಯಂತೆ

ಕಂಪು ಅಳಿಯದಿರಲಿ

- ತುಳಸಿದಾಸ ಬಿ. ಎಸ್.