ತಾಯಿಯ ಹಾರೈಕೆ (ಕವಿತೆ) - ಪ್ರೊ. ಜಯಶ್ರೀ ಹಿರೇಮಠ.

ನೀ ಜನಿಸಿದಂದು ನನ್ನೆಲ್ಲಾ ಕಷ್ಟ ಕರಗಿ

ಶಾಪ ವಿಮೋಚಿತಳಾದೆ ಆನಂದವಾಗಿ

ನನ್ನ ಬದುಕಿಗೊಂದು ಅರ್ಥ ಸಿಕ್ಕಿತೆಂದು

ಹಿರಿ ಹಿರಿ ಹಿಗ್ಗಿದೆ ಜೀವನವು ಬೇಕಾಗಿ//೧//

ಮಗು ನೀ ಕಂಡ ಕನಸೆಲ್ಲಾ ನನಸಾಗಲಿ

ಹಡೆದಿರುವೆ ಹಣೆ ಬರಹ ಬರೆಯಲಿಲ್ಲ

ಹೋರಾಟದಲ್ಲಿಂದು ಏಕಾಂಗಿ ನೀನು

ಗೆದ್ದಾಗ  ಜಗ ನಿನ್ನ ಹಿಂದೇ ಬರುವುದಲ್ಲ..! //೨//

ನಿನ್ನ ಹಿತ ಶತ್ರುಗಳನ್ನು ಸದಾ ದೂರವಿಡು

ಶರಣಾದ ಬದ್ಧ ವೈರಿಯನ್ನೂ ಕ್ಷಮಿಸಿಬಿಡು 

ಯುದ್ಧವೇ ಜೀವನವು  ಅಂತಾದ ಮೇಲೆ

ವೈರಿಗಳು ಎಷ್ಟಾದರೂ ಇರಲಿ ಬಿಡು//೩//

ಕಷ್ಟವೆಷ್ಟೇ ಬರಲಿ ಧರ್ಮವನ್ನು ಬಿಡದಿರು

ಸತ್ಯ ನಿಷ್ಠೆಗೆ ಗೆಲುವು ಶತ ಸಿದ್ಧವು ತಿಳಿದಿರು

ಬದಲಾವಣೆ ಜಗದ ನಿಯಮವು ತಿಳಿ ನೀನು

ರಾಜಿಸೂತ್ರಕೆ ಬಂದರೆ ರಾಜ್ಯಭಾರ ಬಿಡದಿರು//೪//

ಸೋಲಿನಾ ನಂತರ ಗೆಲುವಿರುವುದು ತಾಳು

ಇತಿಹಾಸ ರಚಿಸಿದವರು ಸೋತವರೆ ಕೇಳು

ಅದೃಷ್ಟದ ಬಾಗಿಲು ನಿನಗೆ ತೆರೆಯ ಬೇಕಷ್ಟೇ 

ಮುಂದೊಂದು ದಿನ ಸಾಧಿಸುವೆ  ಕೇಳು//೫//

ಅಕ್ಕ, ತಂಗಿಯರ ಹಾರೈಕೆ  ನಿನಗಿರುವುದು

ಮಗ ಗೆದ್ದು ಬರಲೆಂದು ತಾಯಿ ಬೇಡುವುದು

ಎಲ್ಲೇ ಇದ್ದರೂ ನೀ ನೆಮ್ಮದಿಯಿಂದಿರು ಮಗು

ನಿನಗೆ ಪರಶಿವನ ಕೃಪೆಯು ಕವಚ ಆಗುವುದು//೬//

ಅನ್ಯಾಯವನ್ನು ನೀನಿನ್ನು  ಸಹಿಸಿದ್ದು ಸಾಕು

ಧರ್ಮ ಮಾರ್ಗದಿ ನೀನು ನಡೆಯಲೇ ಬೇಕು 

ಕತ್ತೆಗೆ ಲತ್ತೆ ಪೆಟ್ಟೇ ಕೊಡ ಬೇಕು ಎಂದಾಗ

ರೌದ್ರ ರೂಪವ ನೀನು ತಾಳಲೇ  ಬೇಕು //೭//

- ಪ್ರೊ. ಜಯಶ್ರೀ ಹಿರೇಮಠ

ಆಯುರ್ವೇದ ಮತ್ತು ಜಾನಪದ ವೈದ್ಯರು ಮತ್ತು ಸಾಹಿತಿ, ಧಾರವಾಡ.

ಮೋ. 9449819425.