ಇನಿಯನಿಗಾಗಿ ಕಾಯುತಿರುವ ಈ ಪುಟ್ಟ ಜೀವ (ಕವಿತೆ) - ಶಾಂತಾರಾಮ ಶಿರಸಿ, ಉತ್ತರ ಕನ್ನಡ.

ನನ್ನ ಹೃದಯದರಮನೆಯ ಪ್ರೀತಿಯ ಇನಿಯ, 

ಈ ಮನ ಬಯಸುತಿದೆ ನಿನ್ನ  ಪ್ರೀತಿಯ,

ಈ ಹೃದಯಕೆ ನೀಡುವೆಯಾ ಪ್ರೀತಿಯ ಅಪ್ಪುಗೆಯ, 

ಓ ನನ್ನ ಪ್ರೀತಿಯ ಗೆಳೆಯ... 

ಮನಸು ಬಯಸುತಿಹುದು ನಿನ್ನ, 

ಬಯಸಿಹೆ ನಾ ಮಾತುಕತೆಯ ಭಾವನೆಗಳೊಂದಿಗಿನ ಮಿಲನ, 

ಈ ಯಾನ ಸಾಗುತಿರಬೇಕು ದಿನ-ಪ್ರತಿದಿನ, 

ಪ್ರತಿದಿನ ಕಾಣುತ್ತಿರುವೆ ನಾ ನಿನ್ನದೇ ಕನಸನ್ನ... 

ನಿನ್ನ ಕಾಣದೇ ಒಂಟಿಯಾಗಿ ಪರಿತಪಿಸುತಿರುವ, 

ಈ ಪುಟ್ಟ ಜೀವ, 

ಪ್ರತಿಕ್ಷಣ ನನ್ನೆದೆ ಬಡಿದುಕೊಳ್ಳುತಿಹುದು ಢವ-ಢವ, 

ನಿನದೇ ನೆನಪುಗಳ ಅಳುಕಿನ ಭಾವ.. 

ನನ್ನ ಒಲವೇ ನೀನೊಮ್ಮೆ ಬಂದರೆ ಶರಣಾಗುವೆ ನಿನಗೆ ಸೋತು, 

ಕೂರುವೆ ನಾ ನಿನ್ನ ಬೆನ್ನಹತ್ತು, 

ಒರಗುವೆ ನಿನ್ನ ಮಡಿಲಲ್ಲಿ ಕ್ಷಣಹೊತ್ತು - ಅದೇ ಎನಗೆ ಮುತ್ತು, 

ನಿನ್ನಿಂದ ಬಯಸಲಾರೆ ಚಿನ್ನ-ಒಡವೆ, ವೈಡೂರ್ಯ, ಮುತ್ತು-ಹವಳ-ಹರಳು, 

ನಿನ್ನ ಅಪ್ಪುಗೆಯ ಆ ಆಲಿಂಗನದ ಆನಂದದ ಕ್ಷಣಗಳು, 

ತುಂಬಿ ಬರುವವು ಎನ್ನ ಕಣ್ಣ ಕಂಬನಿಗಳು,

ನೀನೇ ಆಸರೆಯಾಗುವೆ ಎಂದು ನಂಬಿರುವವಳು, 

ನನ್ನಂತೆ ಇನಿಯನಿಗಾಗಿ ಪರಿತಪಿಸುತಿರುವ ಅವೆಷ್ಟೋ ಜೀವಗಳು, 

ಈ ಮುದುಡಿದ ತಾವರೆಯ ಅರಳಿಸು-ಸಂತೈಸು, 

ಬಂದು ಮೆಲ್ಲ ಮಾತಾಡಿ- ಸ್ಪರ್ಶಿಸಿ ಈ ಜೀವವ ಉಳಿಸು, 

ನೀನಾಗು ನನ್ನ ಹೃದಯದರಮನೆಯ ಅರಸು.... 

- ಶಾಂತಾರಾಮ ಶಿರಸಿ, ಉತ್ತರ ಕನ್ನಡ.

(ನಿಮ್ಮ ಬರಹಗಳ ಪ್ರಕಟಣೆಗಾಗಿ ಸಂಪರ್ಕಿಸಿ 9448713659 ವಾಟ್ಸಪ್ ಮಾತ್ರ)