ಅಪ್ಪ (ಕವಿತೆ) - ರಾಮಲಿಂಗ ಮಾಡಗಿರಿ.

ಹರಿದ ಅಂಗಿ ಕಚ್ಚೆ ತೊಟ್ಟು

ಕುರುಚಲು ಗಡ್ಡ-ಮೀಸೆ ಬಿಟ್ಟು

ಉರಿ ಬಿಸಿಲಲ್ಲಿ ಬರಿಮೈಲಿ ನಿಂತು

ಬೆವರ ಹನಿಯ ನೆಲಕ್ಕೆ ಬಸಿದು

ಜೀವನ ಜಂಜಾಟಕ್ಕೆ ಸಿಕ್ಕು ವಿದ್ಯೆಯಿಂದ ವಂಚಿತವ

ಮಕ್ಕಳಿಗೆ ಜ್ಞಾನದ ಸುಧೆ ಎರೆದವ

ಆಸೆ-ಆಕಾಂಕ್ಷೆಗಳಿಗೆ ತರ್ಪಣವ ಬಿಟ್ಟು

ತನ್ನವರಿಗಾಗಿ ಜೀವನವನ್ನೇ ಮುಡಿಪಾಗಿಟ್ಟವ

ತಾನುಣ್ಣುವ ತುತ್ತಲಿ

ಮನೆಯೊಡತಿ-ಮಕ್ಕಳ ಹೊಟ್ಟೆ ತುಂಬಿಸಿ

ಹಸಿದೊಟ್ಟೇಲಿ ಮಲಗಿದವ

ಹೊಟ್ಟೆತುಂಬಿತೆಂದವ

ಮಕ್ಕಳು ಬಿಟ್ಟ ಎಂಜಲನ್ನು ಪ್ರೀತಿಯಿಂದ ಉಂಡವ

ಕಣ್ಣೀರಲಿ ಕೈತೊಳೆದು ಪ್ರೇಮದಿಂದ ಸಲುಹಿದವ

ಕಷ್ಟಗಳೆಂಬ ಶರಗಳಿಗೆ ಕವಚವಾಗಿ ಮುಗ್ಗರಿಸಿದವ

ಮೈಯೊಳಗಿನ ರಕ್ತ ಬಸಿದು ಸಿರಿಸಂಪತ್ತ ಗಳಿಸಿದವ

ಮಮತೆ-ಸ್ಪೂರ್ತಿಯ ಸೆಲೆಯಾಗಿ

ಪ್ರೇಮದ ಜ್ಯೋತಿಯಾಗಿ

ಬಾಳೆಂಬ ಗಾಣಕ್ಕೆ ಎತ್ತಾಗಿ ಸವೆದವ

ಮನೆತನದ ಗೌರವವನ್ನು ಕಣ್ರೆಪ್ಪೆಯಾಗಿ ಕಾಯ್ದವ.

                             -ರಾಮಾ.

               (ರಾಮಲಿಂಗ ಮಾಡಗಿರಿ).  

(ನಿಮ್ಮ ಬರಹಗಳ ಪ್ರಕಟಣೆಗಾಗಿ ಸಂಪರ್ಕಿಸಿ 9448713659 ವಾಟ್ಸಪ್ ಮಾತ್ರ)