ದೂರ ತೀರದ ಯಾನ (ಕವಿತೆ) - ಸುಭಾಷ್ ಸವಣೂರು.

ಮನದಂತರಾಳದಲಿ ಗರಿಗೆದರುತಿದೆ 

ನೊರೆಂಟು ಬಣ್ಣ ಬಣ್ಣದ ಚಿತ್ತಾರಗಳು

ಹೃದಯದಲಿ ಹಾಗೆ ಗೂಡು ಕಟ್ಟಿದೆ

ಪ್ರೀತಿ ಪ್ರೇಮಗಳ ಮಧುರ ಬಾಂಧವ್ಯವು

ಕಂಡು ಕಾಣದೆ ಸುಮ್ಮನೆ

ಮರೆಯಾದ ಸವಿಗನಸುಗಳು

ಹಾಗೆ ಹುದುಗಿ ಹೋಗಿವೆ

ಅಂತರಂಗದ  ಭಾವನೆಗಳಲಿ

ಎಳೆ ಎಳೆಯಾಗಿ ಹರಿದು ಬರುತಿವೆ

ನೆನಪಿನ ಒಡಲಾಳದಿಂದ

ಅಂದು ಮೌನದಲ್ಲೇ ಅಳಿದು ಹೋದ

ಆ ಸುಂದರ ಕಾವ್ಯಗಳು

ಸಾಗುತಿದೆ  ಜೀವನದ ಪಯಣವು

ಸಾಗರದೀ ತೇಲುವ ನಾವೆಯ ಹಾಗೆ

ನಾವಿಕ ನೀನು ಪಯಣಿಗ ನಾನು

ಅರಿಯೆ ನಾನಿಂದು ಎಂದು ಸೇರುವೆನೆಂದು

 ಆ  ದೂರ ತೀರದ ಯಾನವ .....!!!!  

  - ಸುಭಾಷ್ ಸವಣೂರು.