ಚೆಲುವೆ (ಜಾನಪದ ಶೈಲಿ ಗೀತೆ) - ಕಟ್ಟೆ ಎಂ ಎಸ್ ಕೃಷ್ಣಸ್ವಾಮಿ

ಕೆರೆ ದಂಡೆ ಮೇಲೆ ನಿಂತುಕೊಂಡು

ಮಲ್ಲಿಗೆ ದಂಡೆ ಹೂವ ಮುಡಕೊಂಡು

ಶಶಿಯಂತ ಮೊರೆಯವಳೇ ನೀನ್ಯಾರೆ

ಮುದ್ದು ಚೆಲುವೆ ನೀನ್ಯಾರೆ ನೀನ್ಯಾರೆ//೧//

ಕಿಲಕಿಲನೆ ನಗುತ ನೆಲವನ್ನೇ ಕೆರೆಯುತ

ಹೃದಯವ ಕಲುಕುವ ಹೆಣ್ಣೇ,ನೀನ್ಯಾರೆ

ತುಂಬು ಮನದ ಚೆಲುವೆ ನೀನ್ಯಾರೆ

ನೀನ್ಯಾರೆ ನೀನ್ಯಾರೆ ನೀನ್ಯಾರೆ//೨//

ಉದ್ದನೆ ನಾಗರ ಜಡೆಯವಳೇ

ಜಿಗಿಯುವ ಜಿಂಕೆಯ ನಡೆಯವಳೆ

ಹೊಳೆಯುವ ಸೌಂದರ್ಯವತಿಯೇ

ನೀನ್ಯಾರೆ ನೀನ್ಯಾರೆ ನೀನ್ಯಾರೆ//೩//

ಹಣೆಯಲಿ ರವಿಯಂತ ಬೊಟ್ಟುಯಿಟ್ಟು

ಅಂದದ ಕಣ್ಣಿಗೆ ಕಾಡಿಗೆಯಿಟ್ಟು

ಬಂಗಾರದ ಮೂಗುತಿ ತೊಟ್ಟವಳೇ

ನೀನ್ಯಾರೆ ನೀನ್ಯಾರೆ ನೀನ್ಯಾರೆ//೪//

ಕೈಗೆ ಬಣ್ಣ ಬಣ್ಣದ ಬಳೆಯ  ತೊಟ್ಟು

ಬೆಳ್ಳಿ ಕಾಲ್ಗೆಜ್ಜೆಯ ನಾದವ ಕೊಟ್ಟು

ಮಂದಹಾಸ ಬೀರುತ್ತ,ತುಂಟನಗೆ ಚೆಲ್ಲುತ್ತ

 ಬಿಂಕದ ಸುಂದರಿ ನೀನ್ಯಾರೆ ನೀನ್ಯಾರೆ//೫//

ಬಳುಕುವ ನಡೆ ಚಂದ ಕೋಗಿಲೆಯ ನುಡಿ ಚೆಂದ

ಮಾಣಿಕ್ಯದಂತ ನುಡಿಯವಳೆ ನೀನ್ಯಾರೆ

ನವಿಲಂತ ವೈಯ್ಯಾರಿ ಸೊಬಗಿನ ಬಂಗಾರಿ

ನೀನ್ಯಾರೆ ನೀನ್ಯಾರೆ ನೀನ್ಯಾರೆ//೬//

ವನಕೆಲ್ಲ ಹಸಿರಾಗಿ ಪ್ರಾಣಕ್ಕೆ  ಉಸಿರಾಗಿ

ನನ್ನ ಕನಸ ಕದ್ದ ಕಣ್ಮಣಿ ನೀನ್ಯಾರೆ

ಮನವ ಕಲಕುತ ಕಿಲಕಿಲನೆ ನಗುತ

ನೀರ ಹೊತ್ತು ಬರುವವಳೇ ನೀನ್ಯಾರೆ ನೀನ್ಯಾರೆ//೭//

ಚಿತ್ತದಿ ರಂಗಿನ ಚಿತ್ತಾರ ಪಡೆದು ನೀ ಆಕಾರ

ಹರಿಯುವ ನೀರಂತೆ ಜೇನಿನ ಹೊಳೆಯಂತೆ

ಗುಡಿಯೊಳಗೆ ಎಂದು ನೀ ಬರುವೆ ನನಾ ಚೆಲುವೆ

ತುಂಬು ಮನದವಳೇ ನೀನ್ಯಾರೆ ನೀನ್ಯಾರೆ//೮//✍️

- ಕಟ್ಟೆ ಎಂ ಎಸ್ ಕೃಷ್ಣಸ್ವಾಮಿ

ಸಾಹಿತಿ ನಟ ಸಂಘಟಕ 

ಅಂಚೆ ಜೀವ ವಿಮೆ ಮಂಡ್ಯ.

(ನಿಮ್ಮ ಬರಹಗಳ ಪ್ರಕಟಣೆಗಾಗಿ ಸಂಪರ್ಕಿಸಿ 9448713659 ವಾಟ್ಸಪ್ ಮಾತ್ರ)