ಮೀರಾಮಾಧವ (ಕವಿತೆ) - ಅಭಿಜ್ಞಾ ಪಿ ಎಮ್ ಗೌಡ.

ಮೀರಾಮಾಧವ

ಮೀರಭಾವದಲಿ ತಂತಿವಾದ್ಯವದು

ಕೃಷ್ಣನಂದವನು ವರ್ಣಿಸೀ|

ನೀರೆಯಂದದಲಿ ಗಾನಕೋಗಿಲೆಯು

ಹಾಡಿಕೊಂಡಿರಲು ಚಂದದೀ|

ಬೀರಿ ಸೊಂಪಿನಲಿ ಪೇಶಲಾಂಕಿತೆಯ

ತಂತಿವೀಣೆಯದು ನಿತ್ಯ ತಾ|

ಪಾರಿಜಾತದಲಿ ಗಂಧಸೂಸುತಿದೆ

ತಾಣದೀವಿಗೆಯ ತಂಪಲೀ||

ವೇಣುನಾದದಲಿ ಲೋಕಲೋಗರವ

ಸೂರೆಗೊಂಡಿರಲು ಯೋಗಿನೇ|

ಪಾಣಿಲಾಘವದಿ ಬಿಚ್ಚುಮೊಗ್ಗೆಯಲಿ

ಮಾಡಿ ತಾನಿರಲು ಪಾರ್ಥನೇ|

ಬಾಣವೂಡಿರುವ ಚೋರಕೃಷ್ಣನನು

ಕೂಗಿ ತಾ ಬರಲು ಕೋಮಲೇ|

ವೀಣೆವಾದ್ಯದಲಿ ನಾಮಧಾರಿಯನು

ಹಾಡಿ ತಾ ಕರೆದು ಕೂಡಿಸೀ||

ಕಣ್ಣನೀರಿನಲಿ ಅರ್ಥಿಬಿಂಬವದು

ಧರ್ಮಸೂಕ್ಷ್ಮವನು ಹೇಳುತಾ|

ಬಣ್ಣಬಣ್ಣದಲಿ ತೇಲಿಹೋಗುತಿಹ

ಧರ್ಮವೀರನದು ನಿರ್ವೃತಾ|

ಬೆಣ್ಣೆಕದ್ದಿರುವ ಕಳ್ಳಕೃಷ್ಣನನು

ಮೀರ ತಾ ಸೆಳೆದು ಪೇಳ್ವುತಾ|

ಸಣ್ಣಮಾತಿನದು ಸೂಕ್ಷ್ಮಬುದ್ಧಿಯಲಿ

ಪಾರ್ಥಸಾರಥಿಯ ನೋಡುತಾ||

ಕೃಷ್ಣಲೀಲೆಯನು ಹಾಡಿಕೊಳ್ಳುತಲಿ

ಬೀದಿಬೀದಿಯಲಿ ಹೋದಳೂ|

ಜಿಷ್ಣುವಾಗುತಿಹ ಕಾಲದೇವನನು

ಪೂಜೆಗೈಯುತಲಿ ಮೀರೆಯೂ|

ವಿಷ್ಣುರೂಪವಿರೆ ಪಾಂಡುರಂಗನಿವ

ವಿಶ್ವರೂಪವನು ತೋರಿದಾ|

ಉಷ್ಣಕಾಲದಲಿ ಪನ್ನಗಾಶನವು

ಹೊಮ್ಮಿ ತಾ ಬರಲು ಬೀರಿದಾ||

- ಅಭಿಜ್ಞಾ ಪಿ ಎಮ್ ಗೌಡ.

(ನಿಮ್ಮ ಬರಹಗಳ ಪ್ರಕಟಣೆಗಾಗಿ ಸಂಪರ್ಕಿಸಿ ‌9448713659 ವಾಟ್ಸಪ್ ಮಾತ್ರ)