ದೇವರ ಕೈ ಜಾರಿ ಬಂದ ನನ್ನಮ್ಮ (ಕವಿತೆ) - ಸಹನಾ ಯಶವಂತ್ ಗೌಡ.

ದೇವರ ಕೈ ಜಾರಿ ಬಂದ ನನ್ನಮ್ಮ

ಸುಖ ಸಂಸಾರಕ್ಕೆ ಅಂದು ಅಂಜಿಕೆಯಿಂದ ಕೊರಳೊಡ್ಡಿ ಗಂಡನ ಮಡಿಲು ಸೇರಿದೆ.

ನವ ಮಾಸಗಳಲ್ಲೆ ಜೀವನದ ಎಲ್ಲಾ ಕನಸುಗಳಿಗೆ ರೆಕ್ಕೆ ಕಟ್ಟಿ ಲಾಲಿ ಹಾಡಿದೆ//

ನಿನ್ನ ಪ್ರಾಣವು ಲೆಕ್ಕಿಸದೆ ಪುನರ್ಜನ್ಮದಂತೆ ಇನ್ನೊಂದು ಜನ್ಮವನ್ನೆ ಸೃಷ್ಟಿಸಿದೆ.

ಮಗು ಹುಟ್ಟಿದಾಗ ಅಳುತ್ತಿತ್ತು,ನೀನು ಮಾತ್ರ ಆಶ್ಚರ್ಯ ಅದ್ಭುತಗಳ ಸಮ್ಮಿಲನದಲ್ಲಿ ನಗುತ್ತಿದ್ದೆ//

ಉಸಿರು ಹೆಸರು ಬದುಕು ಕೊಟ್ಟು ಹರಸಿ ಮುತ್ತು ಇಟ್ಟವಳು.

ಹಸಿದಾಗ ಅವಳ ಹಸಿವ ಮುಚ್ಚಿಟ್ಟು ತುತ್ತು ಇಟ್ಟವಳು//

ತಪ್ಪು ಮಾಡದಹಾಗೆ ಬೇರೆಯವರ ಮುಂದೆ ತಲೆ ತಗ್ಗಿಸದಹಾಗೆ ಬದುಕು ಕಲಿಸಿದವಳು. 

ಅಪ್ಪನ ಜೊತಗೆ ಕಷ್ಟ ಕಾರ್ಪಣ್ಯಗಳ ಸಹಿಸಿ ಸಂಸಾರದ ನೌಕೆಯನ್ನು ದಡ ಸೇರಿಸಿದವಳು//

ಸೋಲೇ ಗೆಲುವಿನ ಸೋಪಾನವೆಂದು ಪ್ರತಿ ಹೆಜ್ಜೆಯಲ್ಲು ಬೆನ್ನೇಲುಬಾಗಿ ನಿಲ್ಲುವಳು.

ಮಳೆಯಲ್ಲಿ ಒದ್ದೆಯಾದರೆ, ಬೈಗುಳದಲ್ಲು ಪ್ರೀತಿ ನೀಡುವಳು//

ಬದುಕಿನ ಅವಿಭಾಜ್ಯ ಅಂಗವಾಗಿ ಅಭಿವೃದ್ದಿಗೆ ನಾಂದಿಯಾದವಳು.  

ಸೋತಾಗ ಆತ್ಮ ಸ್ಥೈರ್ಯ ತುಂಬಿದವಳು//

ಸಂಸಾರದ ಸಾರಥಿಯಾಗಿ ಮನ ಮನೆಯ ಬೆಳಗಿಸಿದೆ.

ತ್ಯಾಗದ ದೃಷ್ಟಿಯಲ್ಲಿ ಸಂಭ್ರಮದ ವರ್ಷಾಚರಣೆಯಾಗಿಸಿದೆ//

ಜಗದೊಳು ಮಿಗಿಲು ನಿನ್ನ ಒಲವು,ಜನ್ಮದ ನಂಟು ಬೆಸೆದಿದೆ.

 ಪ್ರತಿ ಸಾರಿ ಸಲಹಲಾಗದೆ, ಅಮ್ಮಾ ಎಂಬ ಅಮೂರ್ತ ರೂಪವನ್ನೇ,ದೇವರೆ ನಮಗೆ ನೀಡಿದೆ//

- ಸಹನಾ ಯಶವಂತ್ ಗೌಡ

ಕ ರಾ ಮು ವಿ ಮೈಸೂರು.

(ನಿಮ್ಮ ಬರಹಗಳ ಪ್ರಕಟಣೆಗಾಗಿ ಸಂಪರ್ಕಿಸಿ 9448713659 ವಾಟ್ಸಪ್ ಮಾತ್ರ)