ವೈರಾಗ್ಯ ಗರ್ಜನೆ...

!!! ವೈರಾಗ್ಯ ಗರ್ಜನೆ ???

ಹೊಡೆಯ ಬೇಕೆನಿಸಿದೆ ಗಾಡಿಯನು

ಸ್ಮಶಾನಕೆ

ಭ್ರಷ್ಟಾಚಾರ,ಅನಾಚಾರ,ಅನೀತಿಗಳ

ಬೇಸರಕ್ಕೆ |

ಈ ಜಗತ್ತು ಸರಿಯಿಲ್ಲ

ಈ ಜಗತ್ತು ನಮಗಲ್ಲ |

ಸಾಕಾದ ಈ ಜೀವ ಅಲ್ಲಾದರೂ

ಮಲಗಲಿ

ಮಣ್ಣಡಿಯ ಶ್ರಮಜೀವಿಗಳುದರವಾದರೂ

ಬೆಳಗಲಿ ||

ಸತ್ಯದಾ ನಿತ್ಯ ಸಸಿನ ಜೀವಗಳ

ಹೆಸರನ್ನುಳಿಸಿತೇ ಈ ಜಗತ್ತು

ಉಸಿರಾಯಿತೇ ಹಸಿರನ್ನುತ್ತು |

ಸಾಗಿತಾ ಚೇತನಗಳ ಮಾರಣಹೋಮ

ನಡೆಸಿತಾ ಪ್ರಾಯಶ್ಚಿತ್ತಕ್ಕಾಗಿ ಹೋಮಹವನ |

ಚಿತ್ರಪಟಕೆ ಬಿತ್ತು ಮಾರುದ್ದದ ಹಾರ-ತುರಾಯಿ

ಅಪಮೈತ್ರಿಯ ಜಗಕಾಯ್ತು ಭಾರಿ ಕಮಾಯಿ ||

ತೀರದಾ ಹಸಿವದು ಭ್ರಷ್ಟಾಚಾರ

ಜಗವೇ ಆಗಿಹುದು ಅದಕ್ಕಾಹಾರ |

ಕಿತ್ತು ತಿನ್ನುವಾ ಹಂಬಲ ಕತ್ತೆ ಕಿರುಬಗಳಿಗೆ

ಕತ್ತು ಕೊಯ್ವಾ ಚಪಲ ಮಿಕ ಬಕಾಸುರಗಳಿಗೆ |

ಬೇಸತ್ತು....ಬೇಸತ್ತು...ನಾ...ಸತ್ತು....|

ಹೊಡೆಯ ಬೇಕೆನಿಸಿದೆ ಗಾಡಿಯನು

ಸ್ಮಶಾನಕೆ

ಮಣ್ಣಡಿಯ ನಿಷ್ಟಜೀವಕಾದರೂ

ಅಹಾರವಾಗೋ ಬಯಕೆ ||

ಲಂಚದಾ ಕಿರುಬಗಳಿಗೆ

ಹಾದಿಬೀದಿಯಾ ಹೆಣ |

ಹದ್ದು,ಗೂಬೆ ಖಗಗಳಿಗೆ

ಸಂಭ್ರಮದ ತೋರಣ |

ಆಗುವ ಆಸೆಯಿಲ್ಲ

ಈ ತರದ ಸಾವಿಗೆ ಮನಸ್ಸಿಲ್ಲ ||

ನೊಂದೆನ್ನ ಜೀವಗಳಿಗೆ

ಆಸರೆಯಂತೂ ಆಗಲಿಲ್ಲ

ನೆಮ್ಮದಿಯ ಊಟವಂತು

ಕನಸಾಗೆ ಉಳಿಯಿತಲ್ಲ |

ಸತ್ಯದಾ ಉಸಿರೇ ಕಗ್ಗಂಟಾಯಿತಲ್ಲ

ರಣಹದ್ದುಗಳ ಕೂಗಾಟ ಮೆರೆದಾಡಿತಲ್ಲ ||

ಹೆಗ್ಗಣಗಳ ದಾಳಿಯು ಮುಂದುವರಿದಿದೆ

ನನ್ನ ಬಳಿಗೆ ಈಗ ಬಂದು ಕಾದು ನಿಂತಿವೆ |

ಆಹಾರವಾಗಲು ನನಗಿಲ್ಲ ಮನಸ್ಸು

ನ್ಯಾಯ-ನೀತಿ-ಧರ್ಮವೇ ನನಗೆ ಕಾಸು |

ಮಣ್ಣಡಿಯ ಜೀವಿಗಳೋದ್ಧಾರದ ನೆಪಹೇಳಿ

ಮಡಿದರೆ ಉಳಿವುದೇ ಧರ್ಮವೆನ್ನ ಬಳಿ ||

ಗೊಂದಲದಾ ಗೂಡಾದ ಎನ್ನ ಮನಸ್ಸಿಗೆ

ಕಂಡಿತಾಗ ಎನ್ನಮ್ಮನ ಹರಿದ ಸೀರೆ |

ನವಮಾಸದ ನೋವನ್ನು ನಲಿಯುತ್ತಾ ಉಂಡವಳಾ,

ಹೋರಾಟದ ಜಗದಲ್ಲಿ ಎಲ್ಲವನ್ನು ಕಂಡವಳಾ,

ಬಂಡೆಯಾಗಿ ನಿಂತು ಎನ್ನನ್ನು ಪೊರೆದವಳಾ.......

ಸೀರೆಯಾsss ಚೂರುಗಳು ಅಣಕಿಸಿತು ನನ್ನನ್ನು ||

''ದೌರ್ಭಾಗ್ಯದ ಸರಣಿಗೂ ಅಂಜದೆ,ಬೆಚ್ಚದೆ ಬೆಳೆಸಿದೆ ನಿನ್ನನ್ನು

ವೈರಾಗ್ಯದ ಮೂರ್ತಿಯಾಗಿ ಕೊಡುವೆ ನನಗೆ ಏನನ್ನು !?

ಕ್ಷಣಿಕವಾದ ಈ ಜೀವಕೆ ಸಾವು ಖಚಿತವೇ

ಹಾಗೆಂದ ಮಾತ್ರಕೆ ಆತ್ಮಹತ್ಯೆ ಉಚಿತವೆ |

ಕತ್ತಲಲ್ಲೆ ಕುಳಿತು ಕನವರಿಸುವೆ ಏತಕ್ಕೆ

ಎದ್ದು ಬಂದು ಗರ್ಜಿಸು ದುಷ್ಟರ ಜಗಕ್ಕೆ |

ಮೊಳಗಲಿ ಗರ್ಜನೆ ಸಿಂಹವನ್ನೆ ನಾಚಿಸಿ

ಬಾಲಮುದುಡಿಕೊಳ್ಳಲಿ ಕಿರುಬ-ಮುಂಗುಸಿ |

ಹೆಗ್ಗಣಗಳ ಬಿಲವದು ಮುಚ್ಚಿ ಹೋಗಲಿ

ಹೋರಾಟದ ಕಿಚ್ಚು ಹೊತ್ತಿ ಉರಿಯಲಿ'' ||

ಹೋರಾಟದ ಸಾಗರಕ್ಕೆ ದುಮುಕೋಣ

ಒಬ್ಬಂಟಿಯಾದರೂ ಎದುರಿಸೋಣ |

ತಾನಾಗಿಯೆ ಹೋಗ್ವ ಜೀವ ಹೋರಾಡಿ ಮಡಿಯಲಿ

ಕತ್ತೆ,ಕಿರುಬ,ಹೆಗ್ಗಣಗಳ ಬಲಿಯ ಪಡೆಯಲಿ ||

ಪ್ರಯತ್ನ: ಅಣ್ಣಪ್ಪ ಅರಬಗಟ್ಟೆ